1Jo 4 | JAE | STEP | O lauace, propete dansaŋ taêsam mêŋsêsa dêdêŋ ŋamalac, tec akêŋ êwiŋ ŋalau samob atom. Ansaê ŋalau acgom e ajala oc aŋga Anôtônê me masi.

1 John 4

Anôtônê Ŋalau ma Kilisinê ŋacjosêganê ŋalau

1 O lauace, propete dansaŋ taêsam mêŋsêsa dêdêŋ ŋamalac, tec akêŋ êwiŋ ŋalau samob atom. Ansaê ŋalau acgom e ajala oc aŋga Anôtônê me masi. 2 Amac ajala Anôtônê Ŋalau êndêŋ biŋ tonec gebe Ŋalau taŋ êsôm lasê gebe Jesu Kilisi kêtu ŋamalac naŋ, eŋ aŋga Anôtônê. 3 Ma ŋalau, taŋ êsôm biŋ tonaŋ lasê êpi Jesu atom naŋ, aŋga Anôtônê atom. Eŋ Kilisinê ŋacjosêganê ŋalau. Amac aŋô su gebe oc êmêŋ ma galoc gêmoa nom sugac.

4 O ŋoc gêŋac, amac aŋga Anôtônê, tec aku ŋacjo tulu su, gebe Ŋalau taŋ gêmoa gêwiŋ amac naŋ, ŋajaŋa kêlêlêc ŋalau, taŋ gêmoa gêwiŋ lau nomŋa naŋ su. 5 Êsêac aŋga nom. Kêtu tonaŋŋa êsêac sêsôm biŋ nomŋa ma lau nomŋa sêkêŋ taŋeŋ êsêac. 6 Aêac aŋga Anôtônê. Ŋac taŋ kêjala Anôtô naŋ, kêkêŋ taŋa aêac. Ŋac taŋ aŋga Anôtônê atom naŋ, kêkêŋ taŋa aêac atom. Biŋ tonaŋ gêwa Ŋalau biŋŋanôŋa to ŋalau dansaŋŋa sa gêdêŋ aêac.

Têntac gêwiŋ ŋamôkê Anôtô tau

7 O lauace, takêŋ têntac gêwiŋ elom tau gebe têntac gêwiŋ aŋga Anôtônê. Lau samob, taŋ têntac gêwiŋ naŋ, têtu Anôtônê ŋapalê ma sêjala Anôtô kêtu tôŋ. 8 Ŋac taŋ têtac gêwiŋ gêc eŋŋa atom naŋ, gêjam kauc Anôtô, gebe Anôtô kêtu têntac gêwiŋ ŋamôkê. 9 Anôtô geoc nê têtac gêwiŋ lasê kêpi biŋ tecenec gebe eŋ kêsakiŋ nê Latu tageŋ gêmêŋ nom gebe daŋgôŋ mateŋ jali êtu eŋŋa. 10 Têntac gêwiŋ ŋam kêsêp aêac têntac gêwiŋ Anôtôŋa nec atom, kêsêp Anôtô têtac gêwiŋ aêacŋa ma kêsakiŋ Latu mêŋkêkêŋ tau kêtu da kêtu aêacnêŋ secŋa.

11 O lauace, Anôtô embe têtac êwiŋ aêac kaiŋ teŋ amboac tonaŋ, go aêac takêŋ têntac gêwiŋ elom tau tanac ŋawaegeŋ amboac tonaŋgeŋmaŋ. 12 Ŋamalac teŋ gêlic Anôtô atomanô. Aêac embe takêŋ têntac gêwiŋ elom tau, go Anôtô êmbiŋ aêac tôŋ ma nê têtac gêwiŋ ênac dabiŋ tau ênêc aêacnêŋ ŋalêlôm.

13 Eŋ kêkêŋ Ŋalau gêdêŋ aêac aŋga tau nê Ŋalau, tec gêwa aêac sa gebe tamoa dawiŋ Anôtô ma Anôtô gêmoa gêwiŋ aêac. 14 Ma aêac alic to awa sa gebe Tama kêsakiŋ Latu gebe êtu nom ŋakêsiwaga. 15 Ŋac teŋ embe êsôm lasê gebe Jesu eŋ Anôtônê Latu, go Anôtô êmoa êwiŋ eŋ ma eŋ êmoa êwiŋ Anôtô. 16 Ma aêac tajala to takêŋ gêwiŋ gebe Anôtô têtac gêwiŋ aêac ŋanô.

Anôtô eŋ têntac gêwiŋ ŋamôkê. Ma ŋac taŋ gêmoa totêtac gêwiŋgeŋ naŋ, gêmoa gêwiŋ Anôtô ma Anôtô gemoa gêwiŋ eŋ. 17 Aêac tec tamoa nom tatôm Kilisi gêmoa nom. Aêac embe taêŋ ênam bêc mêtôcna totêntac êpa sugeŋ, go êwa sa gebe têntac gêwiŋ gêjac dabiŋ tau aŋga nêŋ ŋalêlôm. 18 Aêac embe têntac êwiŋ ŋanô, go tatêc tauŋ atom. Têntac gêwiŋ ŋanô kêtiŋ tatêc tauŋŋa su. Tatêc tauŋ ŋam gebe taêŋ gêjam sec ŋagêjô. 19 Aêac têntac êwiŋmaŋ gebe Anôtô têtac gêwiŋ aêac kêtu ŋamata su. 20 Ŋac teŋ embe êsôm gebe “Aê têtac gêwiŋ Anôtô,” mago eŋ embe têtac endec lasitêwai naŋ eŋ dansaŋtêna. Gebe ŋac teŋ embe têtac êwiŋ lasitêwai, taŋ gêlic êsêac naŋ atom, oc êtôm gebe têtac êwiŋ Anôtô, taŋ galic eŋ atom naŋ, amboac ondoc. 21 Biŋsu taŋ takôc aŋga ênê naŋ tonec gebe Ŋac taŋ têtac gêwiŋ Anôtô naŋ, têtac êwiŋ lasitêwai amboac tonaŋgeŋ.